Isomo rya 1 : Buh 9,13-18

Igitabo cy’Ubuhanga

¹³Ninde muntu washobora kumenya ubuhanga imigambi y’Imana? Ni nde washobora gusobanukirwa n’icyo Nyagasani ashaka? ¹⁴Ibitekerezo byacu abantu ntibifashe, bihora bihindagurika ntibigira ishingiro. ¹⁵Umubiri ushanguka uremerera roho, iryo hema ry’ibumba rikabangamira umutima uhorana inkeke. ¹⁶Turushywa no kumenya ibiri ku isi, ndetse n’ibyo dushoboye tubigeraho bituruhije, ariko se ninde wigeze atahura ibiri mu ijuru? ¹⁷Ninde kandi wajyaga kumenya ubushake bwawe, iyo wowe ubwawe udatanga Ubuhanga, n’aho uri mu ijuru ngo wohereze Umwuka wawe mutagatifu? ¹⁸Nguko uko ibitekerezo by’abatuye isi byagorowe, abantu batozwa kumenya ibigushimisha, Ubuhanga bubakiza butyo.

Kuzirikana : Zab 90 (89),3-4,5-6,12-13,14.17ab

ZABURI

• Inyik/ Nyagasani watubereye ikiramiro,
•          Kuva mu gisekuruza kujya mu kindi

 

• Abantu ubasubiza mu mukungugu,
• Kuko wavuze uti « bene muntu nimusubire iyo mwavuye ! »
• Mu maso yawe imyaka igihumbi ni nk’umunsi w’ejo hahise,
• Ni nk’isaha imwe y’ijoro.

 

• Ubuzima bwa muntu ubukuraho nk’ibitotsi,
• Bishira mu gitondo nk’icyatsi ;
• Mu gitondo kirarabya, ururabyo rugakura,
• nimugoroba rukarabirana, rugahunguka.

 

• Utwumvishe ko iminsi yacu ibaze,
• Bityo tuzagire umutima ushishoza.
• Uhoraho, tugarukire ! Uzaturakarira na ryari ?
• Babarira abagaragu bawe.

 

• Utugwirize ineza yawe kuva mu gitondo,
• kugira ngo duhimbarwe iminsi yose y’ubugingo bwacu.
• Nyagasani Mana yacu, utugaragarize ubugwaneza bwawe,
• ukomeze imirimo y’amaboko yacu.

Isomo rya 2 : Filem 9b-10.12-17

Ibaruwa Mutagatifu Pawulo Intumwa yandikiye Filemoni

Nkoramutima yanjye, ⁹jyewe Pawulo w’umusaza, nkubitiyeho no kuba ndi imfungwa kubera Yezu Kristu ubu ngubu, ¹⁰ndagutakambira kubera umwana wanjye nabyariye mu buroko, Onezimi uwo nguwo. ¹²Ubu ndamukugaruriye, we nkoramutima yanjye. ¹³Nashakaga kumugumana hafi yanjye kugira ngo ajye amfasha mu kigwi cyawe,  muri ubu buroko nafungiwemo mporwa Inkuru Nziza. ¹⁴Ariko ntacyo nashatse gukora utabyemeye, kugira ngo icyo gikorwa cyiza kitakubera agahato, ahubwo gituruke ku bwende bwawe. ¹⁵Kandi wenda wamubuze igihe gito none arakugarukiye, kugira ngo uzamuhorane iteka. ¹⁶Uzasanga atakiri umucakara ahubwo atambutse umucakara, usange ari umuvandimwe wawe ukunda: jyeweho niko amereye rwose, nawe niko azakumerera ndetse arusheho, ari mu maso y’abantu, ari no mu maso ya Nyagasani. ¹⁷Niba rero wemera ko ndi incuti yawe, uramwakire nk’uko wanyakira.

Igisingizo cy'Ivanjili : Zab 119 (118),135

Alleluya Alleluya

• Nyagasani, utubengeranisheho uruhanga rwawe,
• kandi utwigishe amategeko yawe.

Alleluya

Ivanjili : Luka 14,25-33

+ Luka

Muri icyo gihe, ²⁵Yezu yari ashagawe n’abantu benshi. Arahindukira arababwira ati ²⁶“Umuntu waza ansanga atabanje guhara se na nyina, umugore n’abana be, abavandimwe na bashiki be ndetse n’ubuzima bwe bwite, uwo nguwo ntashobora kuba umwigishwa wanjye. ²⁷Kandi umuntu wese udaheka umusaraba we ngo ankurikire, ntashobora kuba umwigishwa wanjye. ²⁸Mbese ni nde muri mwe washaka kubaka umunara, ntabanze kwicara ngo arebe ibyo azawutangaho, kandi ngo amenye niba afite ibizawuzuza? ²⁹Aba yanga ko yatangira kubaka agasanga adashobora kuzuza, maze abazamubona bakamuseka bavuga ngo ³⁰Dore umuntu watangiye kubaka, akananirwa no kuzuza! ³¹Cyangwa se ninde mwami waba agiye kurwanya undi mwami, ntabanze kwicara ngo yibaze ko niba afite ingabo ibihumbi icumi, yashobora kurwanya uza kumutera afite ibihumbi makumyabiri? ³²Abonye bitamushobokeye yamutumaho akiri kure, akamusaba ko babana mu mahoro. ³³Nuko rero utazahara ibyo atunze byose, ntashobora kuba umwigishwa wanjye.”

---